Министерството за одбрана на Русија ја потврди смртта на рускиот генерал Антон Грунис, кого претседателот Владимир Путин неодамна го одликуваше со највисокото државно одликување за заземањето на источноукраинскиот град Костјантинивка.

Генерал-мајорот Апти Алаудинов, кој е заменик-началник на идеолошката гранка на Министерството за одбрана и командант на специјалните сили „Ахмат“, рече дека генерал-мајорот Грунис „заминал во друг свет“.

„Тој нè напушти како херој кој ја извршил својата света должност“, рече Алаудинов, без да прецизира кога и како починал Грунис.

Заповедникот на украинските сили за беспилотни системи Роберт Бровди кажа дека Грунис бил убиен во ноќен напад во источниот регион Доњецк на 12 септември.

Грунис командуваше со бригада која игра клучна улога во руската офанзива во регионот Доњецк. Во јули, Грунис лично го информираше Путин за освојувањето на Костјантинивка, за што министерот за одбрана Андреј Белоусов му го додели медалот Херој на Русија во август. Тврдењата за падот на Костјантинивка се оспорени од Украина и независните набљудувачи.

На 14 септември, руските медиуми известија и за смртта на генерал-полковникот Сергеј Милчаков, кој загинал во украински напад врз командно место во Доњецк. Русија официјално не го потврди ова.