Рускиот парламент одобри закон со кој му се дозволува на претседателот Владимир Путин да нареди инвазија на други земји.

Според законот, на Русија ќе ѝ биде законски дозволено да испраќа трупи во странство за да ги заштити руските граѓани кои се уапсени, истражувани, судени или злоупотребени на кој било начин од странски држави или од меѓународни судови и организации во кои Русија не членува.

„Западната правда се претвори во репресивна машина за сузбивање на одлуките кои не се во согласност со оние што ги наметнуваат европските претставници. Во овие околности, важно е да се направи сè за да се заштитат нашите граѓани во странство“, рече Вјачеслав Володин, претседател на руската Дума.

Оваа година, разни европски разузнавачки агенции ја означија Русија како директна закана за западот и НАТО.

Во ЕУ стравуваат дека Кремљ би можел да ја смета следната година или две како идеално време за тестирање на посветеноста на западот кон НАТО. Тој прозорец ќе остане сè додека Доналд Трамп е во Белата куќа, а Европа сè уште не го зајакнала својот воен капацитет, рекоа за „Политико“ тројца политичари од ЕУ директно запознати со дискусиите.

Минатиот месец, Володимир Зеленски предупреди дека балтичките земји би можеле да станат следната цел на Москва ако Украина не добие доволна поддршка.