САД велат дека Израел можеби користел оружје испорачано од Америка во некои случаи кога го прекршил меѓународното хуманитарно право за време на војната во Газа.
„Разумно е да се процени“ дека тоа оружје е користено на начини „неконзистентни“ со обврските на Израел, вели Стејт департментот. Но, се додава дека САД немаат целосни информации во својата проценка и дека испораките може да продолжат. Извештајот вчера беше доставен до Конгресот по одложувањето.
Ревизијата нарачана од Белата куќа испитуваше како оваа земја, заедно со шест други вклучени во конфликт, користела оружје доставено од САД од почетокот на минатата година. И покрај тоа што извештајот беше јасен укор за некои израелски операции во Газа, тој не заклучи дека кампањата на израелските одбранбени сили (ИДФ) го прекршила меѓународното право.
Израел мораше да се соочи со „вонреден воен предизвик“ во борбата против Хамас во Газа, се вели во извештајот. И додаде дека гаранциите што ги добиле од Израел за почитување на легалната употреба на американското оружје се „веродостојни и сигурни“.
Во документот, исто така, се истакнува дека, бидејќи Хамас „ја користи цивилната инфраструктура за воени цели и цивилите како жив штит“, честопати било „тешко да се утврдат фактите на теренот во активна воена зона“ за тоа што се легитимни цели.
Но, се вели дека со оглед на значителното потпирање на Израел на оружје произведено од САД, тие веројатно биле користени „во случаи кои не се во согласност со неговите обврски за МХП [меѓународното хуманитарно право] или со воспоставените најдобри практики за ублажување на цивилната штета“.
Се додава дека „Израел има знаење, искуство и алатки за спроведување на најдобрите практики за ублажување штета за цивилите во неговите воени операции“, но дека „резултатите на теренот, вклучително и високите нивоа на цивилни жртви, покренуваат суштински прашања за тоа дали ИДФ ги користи ефикасно во сите случаи“.
Во извештајот се вели дека ОН и хуманитарните организации ги опишале израелските напори за ублажување на цивилната штета како „неконзистентни, неефикасни и несоодветни“.
