Снимателот на „Фокс њуз“, Пјер Закшевски, загина, додека неговиот колега новинар Бенџамин Хол е ранет во Украина, потврди американската ТВ-мрежа на својот сајт. Украинските медиуми објавија дека во инцидентот во близина на Киев загинала и украинската новинарка Олександра Кувшинова.
„Закшевски и Кувшинова починале како последица на гранатирањето на руските сили во селото Горенка“, објави сајтот „кп.уа“.
„Фокс њуз“ соопшти дека 55-годишниот Закшевски често работел во воени зони, вклучувајќи ги Ирак, Авганистан и Сирија.
Ова следува само два дена откако во градот Ирпин загина американскиот филмаџија и новинар Брент Рено.
