Британскиот премиер Кир Стармер, францускиот претседател Емануел Макрон и германскиот канцелар Фридрих Мерц ги повикаа иранските лидери да започнат преговори и „да не преземаат никакви понатамошни дејствија што би можеле да го дестабилизираат регионот“.
Во заедничка изјава по денешните разговори, тие рекоа: „Ќе продолжиме со нашите заеднички дипломатски напори за смирување на тензиите и осигурување дека конфликтот нема да се интензивира и прошири понатаму“.
Тројцата лидери нагласија дека „Иран никогаш не може да има нуклеарно оружје и повеќе не може да претставува закана за регионалната безбедност“ и ја потврдија поддршката за безбедноста на Израел, но не ги поддржаа американските напади.
Само еден ден пред нападот на САД, високи дипломати од трите земји и Европската Унија се сретнаа со иранскиот министер за надворешни работи во обид да најдат дипломатски начин за прекин на конфликтот со Израел и ублажување на тензиите околу нуклеарната програма на Техеран.
