Доналд Трамп изјави дека ФБИ ја истражува љубовната врска на извршниот директор на „Енвидија“, Џенсен Хванг, со наводна кинеска шпионка. Трамп кажа дека разговарал со Хванг вчера, по извештаите дека тој бил мета на кинеска шпионска кампања.

„Му го поставив тоа прашање: ‘Дали знаеше дека е шпионка?‘ Тој рече: ‘Не знаев‘ и навистина му верувам“, рече Трамп.

Кина ги отфрли тврдењата дека го шпионирала Хванг, при што министерството за надворешни работи изјави дека обвинувањата се „целосно неосновани, шпекулативни и имаат намера да ја оцрнат Кина“.

„Енвидија“ нарача независна истрага за аферата во која е вклучена Алис Хванг и изјави дека нема причина да верува дека тајните на компанијата или националната безбедност се компромитирани. Алис Хванг е поранешна извршна директорка на компанијата „Мегаспид“ со седиште во Сингапур, која американските власти ја истражувале и заклучиле дека била поврзана со кинеската разузнавачка служба.

Според „Њујорк тајмс“, државниот секретар Марко Рубио испратил меморандум до високите функционери во Вашингтон минатата пролет, предупредувајќи дека шефот на „Енвидија“ е во блиска врска со кинеска шпионка. Џенсен Хванг признал во компанијата дека бил неверен и се извинил што ги повредил сопругата и нивните деца.

Во Белата куќа, Трамп беше прашан неколкупати кога дознал за врската.

„Бев информиран пред одреден временски период. Сметам дека Хванг е чесен човек и уверен сум дека ќе биде добро по истрагите. Се надевам дека нема проблем, верувам дека многу страда“, кажа Трамп.

„Енвидија“ постои со децении. Хванг ја основал со уште двајца инженери во 1993, но нејзиниот подем во една од највредните и најмоќни компании во светот е од неодамна. Денес е втората највредна компанија во светот, по „Епл“ и дизајнира компјутерски чипови кои станаа централни за развојот на вештачката интелигенција.

Скандалот ја намали вредноста на компанијата за околу 250 милијарди долари, откако цената на акциите падна за повеќе од 4%.