Европски лидери ќе ги посетат САД денеска или утре за да разговараат за начините на завршување на војната во Украина, изјави Доналд Трамп. Тој додаде дека наскоро ќе разговара и со Владимир Путин откако навести дека е спремен за втора фаза од санкциите за Русија.

Володимир Зеленски изјави дека санкциите се вистинската идеја и ги повика европските држави да престанат да ги купуваат руските енергенси.

Ова уследи ден по најголемиот руски воздушен напад врз Украина од почетокот на војната, кога за првпат беше погодена и зградата на украинската влада во Киев. По нападот во кој биле лансирани 810 дронови и 13 проектили, Трамп кажа дека не е среќен со ситуацијата.

„Некои европски лидери ќе дојдат во Вашингтон денеска или утре“, кажа Трамп, не прецизирајќи кои ќе бидат.

Русија продолжи со нападите врз Украина и по самитот Трамп-Путин на Алјаска минатиот месец. Зеленски ги поздрави плановите на Трамп за воведување секундарни царини за земјите кои тргуваат со Русија.

Од почетокот на војната, Русија продала нафта и гас во вредност од 985 милијарди долари, според Центарот за истражување на енергијата и чистиот воздух. Најголемите купувачи биле Кина и Индија, додека Европската Унија драстично го намалила увозот.

„Ако ЕУ ги зголеми санкциите и секундарните царини за земјите кои ја купуваат руската нафта, руската економија ќе колабира и Путин ќе мора да седне на преговарачка маса“, изјави американскиот министер за финансии Скот Бесент.