Американскиот претседател Доналд Трамп смета дека Русија треба да се врати во Г-7 и рече дека е грешка што Москва е протерана. Русија беше членка на групата на најнапредни светски економии, тогаш позната како Г-8, до 2014 кога беше исклучена поради нејзината анексија на украинскиот регион Крим.

„Би сакал да ја вратам. Мислам дека беше грешка што ја исфрливме. Видете, не е прашање дали ја сакаме Русија или не ја сакаме Русија. Тоа беше Г-8. Мислам дека Путин би сакал да се врати“, рече Трамп во Белата куќа објавувајќи нови реципрочни царини на САД.

На оваа изјава на американскиот претседател сè уште нема реакција од Канада која е претседавач со Г-7 оваа година.