Брод во сопственост на Велика Британија, нападнат од милитантните хути минатиот месец, вчера потона во Црвеното Море, потврди американската војска, и го повтори предупредувањето од меѓународно признатата влада на Јемен дека товарот со опасно ѓубриво на бродот претставува ризик за морскиот свет. „Рубимар“, регистриран во Белизе, е првиот потонат брод откако во ноември хутите почнаа да гаѓаат комерцијални бродови. Тие напади со беспилотни летала и ракети ги принудија бродските фирми да ги пренасочат бродовите на подолгата рута околу јужна Африка, нарушувајќи ја глобалната трговија со одложување на испораките и зголемување на трошоците.
Бродот „Рубимар“ потона во јужниот дел на Црвеното Море ноќта меѓу петокот и саботата, според изјавите на јеменската влада и ЦЕНТКОМ. Американската војска претходно соопшти дека ракетниот напад на 18 февруари значително го оштетил бродот што предизвика нафтена дамка долга 29 километри. Бродот превезувал околу 21.000 метрички тони ѓубриво, соопшти вчера ЦЕНТКОМ.
Испуштањето на толку големи количини ѓубриво во Црвеното Море е сериозна закана за морскиот свет, изјави Али Ал-Савалмих, директор на морската научна станица на Универзитетот во Јордан. Преоптоварувањето со хранливи материи може да стимулира прекумерен раст на алгите, трошејќи толку многу кислород што редовниот морски живот не може да преживее, рече Ал-Савалмих, опишувајќи го процесот наречен еутрофикација.
„Земјите од Црвеното Море треба да усвојат итен план за воспоставување агенда за мониторинг на загадените области во Црвеното Море, како и усвојување стратегија за чистење“, рече тој.
Ахмед Авад бин Мубарак, министер за надворешни работи во меѓународно признатата влада на Јемен во Аден, во објава на Х рече:„Потонувањето на ‘Рубимар’ е еколошка катастрофа каква што Јемен и регионот никогаш претходно не ја доживеале. Тоа е нова трагедија за нашата земја и нашиот народ. Секој ден ја плаќаме цената за авантурите на хутската милиција“. Меѓународно признатата влада, која е поддржана од Саудиска Арабија, е во војна со хутите од 2014.
Бродот што тоне „претставува ризик од подземен удар за другите бродови кои транзитираат по прометните бродски коридори на водениот пат“, се вели во соопштението на американската Централна команда (ЦЕНТКОМ) на платформата X.
Хутите, милитантна група поддржана од Иран која го контролира северот на Јемен и другите големи центри, велат дека нивните напади се знак на солидарност со Палестинците во Газа. Поради нападите на Хутите имаше серија напади врз нивните позиции од САД и Велика Британија, а другите морнарици испратија бродови во регионот за да се обидат да ја заштитат виталната трговска рута на Суецкиот Канал.
