САД планираат да испратат најмалку 30 тенкови „М1 абрамс“, а Германија ќе ја помогне украинската борба против руската инвазија со 14 „леопарди“, откако и двете земји најавија голем пресврт по неколкумесечната воздржаност по ова прашање.
Се очекува администрацијата на Џо Бајден денеска да ги објави плановите за испраќање на тенковите и целта на овој потег е да се охрабрат сојузниците да продолжат да ја помагаат Украина. Германскиот канцелар Олаф Шолц, пак, денеска ќе се обрати во парламентот.
Рускиот амбасадор во САД Анатоли Антонов изјави дека „ова е уште една бесрамна провокација“, додека Кремљ кажа дека германската одлука за тенковите нема да донесе ништо добро и ќе остави траен белег врз односите со Русија.
Сè досега, Германија и САД даваа отпор на внатрешните и надворешните притисоци да испратат свои тенкови во Украина. Вашингтон кажуваше дека за високотехнолошките тенкови „абрамс“ се потребни обемни обука и одржување, додека Германија сметаше дека испраќањето на тенковите ќе значи ескалација на војната.
Велика Британија прва објави дека ќе испрати 14 тенкови „челенџер“ во Украина, а помош во модерни тенкови најавија и Полска и Норвешка. Германскиот министер за одбрана Борис Писториус кажа дека Берлин им дал зелено светло на другите земји да ги обучуваат Украинците да ги користат тенковите „леопард“.
