Унгарија најави дека ќе ја тужи Европската комисија откако ѝ беше изречена огромна казна за кршење на европскиот закон за азил.
Во јуни, Европскиот суд на правдата ја казни Унгарија со 200 милиони евра зашто го кршела законот за азил така што незаконски приведувала баратели на азил и ги депортирала пред да можат да се жалат на одбиените апликации.
Ѓерѓи Ѓулаш, шефот на кабинетот на премиерот Виктор Орбан, изјави дека унгарскиот министер за ЕУ, Јанош Бока, ќе преговара за казната со Европската комисија и објави предупредување до шефовите на ЕУ. Ѓулаш вели дека место казна, Унгарија треба да добие делумен надоместок во готовина бидејќи потроши две милијарди евра за гранична контрола без никаква релевантна финансиска помош од Брисел.
„Додека други земји добија финансиска помош за заштита на шенгенската граница, унгарското министерство за правда е подготвено да поднесе тужба против Комисијата за да ги надомести трошоците за заштита на границите на ЕУ“, вели Ѓулаш.
Унгарија веќе го пропушти првиот рок за исплата на казната, што беше на 3 септември, но Комисијата ѝ постави втор рок до 17 септември. Доколку Будимпешта дотогаш не плати 200 милиони евра, Комисијата ќе покрене постапка за одземање на сумата од фондовите на ЕУ што ѝ припаѓаат на Унгарија.
