Унгарскиот парламент денеска го усвои амандманот на уставот насочен против ЛГБТ заедницата и, како што владата ги нарече, политички мрежи за притисок финансирани од странство кои ја поткопуваат демократијата. Уставната измена беше изгласана со 140 гласа „за“ и 21 „против“, и покрај неколкунеделните протести.

Аналитичарите сметаат дека премиерот Виктор Орбан сака со оваа уставна измена да ја зајакне својата база на гласачи и да привлече гласови од крајната десница. Тој вети дека ќе го запре странското финансирање на независни медиуми и невладини организации во Унгарија, додека ја зголемува својата политичка кампања против ЛГБТ заедницата.

Изгласаниот уставен амандман ги истакнува заштитата на здравјето на децата и моралниот развој над сите други права.

„Пратениците ја гледаат оваа промена како уставна заштита од идеолошките влијанија кои ја загрозуваат благосостојбата на децата, особено во контекст на настани како парада на гордоста“, изјави портпаролот на владата Золтан Ковач.

Промените ќе вклучат во уставот дека Унгарија признава само два пола, машки и женски, во согласност со христијанско-конзервативната агенда на Орбан. Унгарскиот парламент на 18 март ја забрани парадата на гордоста, ефективно ограничувајќи ја слободата на собирање. Партијата на Орбан, Фидес, рече дека овој настан може да се смета за штетен за децата.