Велика Британија ја пријави најголемата дневна бројка на починати од КОВИД-19 досега – 938, со што трагичниот биланс во земјата порасна на 7.097.

Од владата информираа дека состојбата на премиерот Борис Џонсон се подобрува. Тој и изминатата ноќ ја поминал на интензивна нега, откако завчера му се влошиле симптомите на коронавирус.

„Тој почна да седи и има добра комуникација со лекарите“, кажаа на дневниот владин брифинг.

Италија бележи пад на бројот на починати, 542 во последните 24 часа, што е најмалку од 19 март. Вкупната бројка мртви порасна на 17.669, што и натаму е најмногу на светот.

Во Италија досега има 139.422 заразени, од кои 3.836 се нови случаи, речиси 800 повеќе во споредба со вчера.

Во Шпанија има 757 починати од КОВИД-19 во последните 24 часа, со што бројката е во пораст втор ден по ред. Регистрирани се и 6.180 новозаразени, што исто така е повеќе во споредба со вчера.

Од досега заразените 146.690, починале 14.555 пациенти, а заздравиле над 48.000.