САД предложиле Русија да подготви нов нацрт-договор за безбедност со Европа, во кој Москва би ги навела не само своите барања, туку и чекорите што е подготвена да ги преземе за намалување на тензиите, објави сајтот „Аксиос“, повикувајќи се на два извора запознати со ова прашање

Со години, Русија се стреми да склучи договор за европска безбедност што би го ограничил проширувањето на НАТО и би го намалил военото присуство на алијансата во Источна Европа. САД ги отфрлија овие барања во минатото, но сега се чини дека се подготвени да ги разгледаат во некоја форма како дел од поширок договор за завршување на војната во Украина.

По дводневните разговори помеѓу Русија, Украина и САД во Абу Даби, американските пратеници Стив Виткоф и Џаред Кушнер отпатуваа за Москва на средба со Владимир Путин денеска, по што ќе разговараат и со Володимир Зеленски. Виткоф и Кушнер исто така бараат Европа да се вклучи во идните разговори за Украина, на што Кремљ досега се противеше.

Како што објави „Аксиос“, руските преговарачи рекле дека Путин ја започнал инвазијата на Украина затоа што тогашниот американски претседател Џо Бајден не одговорил на негово писмо од 2021 година, во кое ги навел своите безбедносни грижи. Еден извор рекол дека Кушнер и Виткоф им кажале на Русите дека светот значително се променил од 2021.

Тие предложиле Русија да подготви нов нацрт-договор што ќе ги реши нејзините безбедносни грижи и барања, но исто така ќе утврди какви симетрични чекори е подготвена да преземе за да го деескалира конфликтот и да ја увери Европа дека нема да нападне во иднина.

„Зеленски нема да се согласи на договор сè додека не знае што ќе се случи следно во врска со безбедносните гаранции, а и Путин сака да го знае ова. Затоа безбедносното прашање е толку важно“, рече изворот за „Аксиос“, додавајќи дека САД нема да ѝ дадат на Русија право на вето за европските безбедносни прашања.