Рускиот министер за надворешни работи Сергеј Лавров го критикуваше Западот по бомбашките напади во Кабул. Во вчерашните две експлозии на аеродромот во Кабул загинаа над 100 луѓе, меѓу кои и 13 американски војници. Најмалку 150 луѓе се ранети во нападите на групата Исламска држава. Цел на нападите беа луѓе што чекаа ред да ја напуштат земјата откако талибанските милитанти се вратија на власт.
„Мора да се научи лекцијата: обидите да се наметне туѓ систем на вредности се доста експлозивни“, рече Лавров на прес-конференцијата во Рим по разговорите со неговиот италијански колега, пренесе руската новинска агенција Интерфакс. „Се надевам дека на политичарите кои размислуваат за понатамошни дејствија во странски земји, овој заклучок ќе им биде вграден во умот ако се прашаат по третпат“.
Тој ги осуди бомбашките напади во Кабул и повика на „инклузивна привремена влада“ во која ќе бидат вклучени „сите главни политички сили“ во Авганистан.
„За нас е фундаментално важно да се осигура безбедноста на нашите јужни граници, како и на нашите сојузници во Централна Азија“, додаде Лавров.
Додека американските и европските влади се натпреваруваат да ги извлечат своите граѓани и авганистански колеги од Кабул, Русија е една од ретките земји што не беше видно вознемирена од преземањето на талибанците.
Москва веќе извесно време гради контакти со талибанците. Поранешната авганистанска влада поддржана од Запад дури и го обвини претставникот на претседателот на Русија дека е отворен поддржувач на талибанците, што Русија го негираше.
