Володимир Зеленски кажа дека верува дека може да го спаси својот однос со Доналд Трамп по нивната експлозивна средба во Белата куќа во петокот, но смета дека разговорите треба да се водат зад затворени врати.
Зеленски повтори дека Украина нема да ѝ отстапува територии на Русија како дел од мировен план и додаде дека сѐ уште сака да го потпише договорот за ретки минерали со САД.
На петочната средба во Белата куќа пред ТВ-камери, Зеленски беше жестоко нападнат од Трамп и Џеј-Ди Венс, кои го обвинија дека е неблагодарен и не покажува почит кон САД. Зеленски тогаш предвреме мораше да ја напушти Белата куќа, при што Трамп му порача да се врати кога навистина ќе сака мир.
Зеленски беше добро расположен по вонредниот самит на европските лидери во Лондон, на кој беа усвоени четири клучни чекори за решавање на војната во Украина и јасно изрази желба за продолжување на разговорите со Вашингтон.
„Не верувам дека САД ќе запрат со поддршката за Украина. Како лидери на цивилизираниот свет, тие не би сакале да му помагаат на Владимир Путин. Што се однесува до нашите идни односи со САД, мислам дека тие ќе продолжат. Сепак, мислам дека вакви разговори не треба да бидат целосно отворени. Она што се случи не донесе ништо позитивно или дополнително за нас како партнери“, изјави Зеленски.
На самитот во Лондон, европските лидери се согласија да му претстават свој мировен план на Вашингтон, со надеж дека САД ќе понудат безбедносни гаранции за Украина.
„Украина и натаму сака да го потпише договорот за ретки минерали со САД. Се согласивме да го потпишеме и ние бевме спремни. Да бидам искрен, мислам дека и САД се спремни да го потпишат“, изјави Зеленски, додавајќи дека по петочната средба имало контакти помеѓу САД и Украина, но не на високо ниво.
