Првиот Шпанец во вселената Педро Дуке беше именуван за министер за наука во новата социјалистичка влада на Шпанија, која од медиумите беше наречена „феминистички кабинет“.
Новиот премиер и самонаречен феминист Педро Санчес планира да состави влада во којашто мнозинство ќе бидат жени, наспроти досегашниот доминантно машки тим на разрешениот Маријано Рахој.
Жените добија некои од клучните позиции во новата влада, вклучувајќи одбрана, правда, економија, финансии и образование. Заменичката на Санчес, Кармен Калво, ќе биде и министерка за еднаквост.
Меѓу повпечатливите машки министри е 55-годишниот поранешен астронаут Дуке, кој за последен пат беше во вселената во 2003 година како дел од Меѓународната вселенска станица.
