Куманово ќе добие спортско-рекреативен центар за алпинизам, кајак на мирни води и велосипедизам. Проектот „Уредување и валоризација на спортско-рекреативниот центар Бислим“ е на Североисточниот плански регион, а средствата во висина од 128.000 евра се обезбедени од Швајцарската агенција за развој и Министерството за локална самоуправа и тој предвидува целосно искористување на природниот потенцијал на Бислимска Клисура на реката Пчиња.

Во самото креирање на проектот учествувале Федерацијата за спортско качување и алпинизам и Кајакарската федерација на Македонија, која планира тука да го префрли центарот за обука на мирни води.

За потребите на центарот веќе е набавен голем дел од опремата (Фото: СДК.МК)

За потребите на центарот веќе се набавени 15 кајаци, рафтинг чамец, 16 велосипеди, шест електрични велосипеди, два мотора на четири тркала за спасувачките служби, реквизити за уредување и изградба на 60 патеки за спортско качување и виа ферата, комплетна опрема за алпинизам, заштитна и сервис опрема, мобилна ГПС апликација и сѐ друго што е неопходно за непречено користење, функционирање и организирање на спортски тури и натпреварувања.

„Реализацијата на проектот за Бислимска Клисура е во завршна фаза. До крајот на годината треба да заврши уредувањето на рекреативниот центар и од пролет ќе биде ставен во функција на граѓаните, пред сѐ, на љубителите на спортот. Со овој проект Општина Куманово ќе добие современ спортски центар, а граѓаните можност да се занимаат со овие спортски дисциплини“, вели Владимир Павловски, координатор на проектот, вработен во Североисточниот плански регион.

Новиот центар ќе биде пуштен во употреба на пролет (Фото: СДК.МК)

Со центарот ќе стопанисува и менаџира Општина Куманово, која ќе треба да изгради придружни објекти во самата клисура за чување и издавање на опремата.

Бислимска Клисура се наоѓа на пет километри од Куманово, по течението на реката Пчиња и долга е 6,5 километри. Всечена е во карпи и на некои места наликува на кањон. Нуди одлични можности за развој на туризам поради големиот број пештери, ендемски видови на растенија и животински свет и недопрена природа.

Од 2015 година, често ја посетуваат кајакари од западноевропските земји, откако Бислимска Клисура и Пчиња се најдоа во понудата на спортските рекреативци од Чешка, како дел од возбудливата тура „Пловна тура низ Македонија“. Тие во потрага по нови доживувања и спортска рекреација, истражувајќи ги убавините на нашата земја, најчесто кампуваат покрај реката во селото Шупли Камен, бидејќи нема ниту еден сместувачки капацитет во околината.

С. НИКОЛИЌ