Екипите на ЈП „Чистота и зеленило“ од Куманово интензивно работат на дезинфекција на јавните површини во градот, каде фреквенцијата на луѓе е голема и постои опасност од пренесување на коронавирусот. Досега извршена е дезинфекција на двата плоштада, занаетчискиот дом, училишта, урбана опрема, автобуските постојки, детски катчиња, тениски игралишта, катната гаража и улиците и тротоарите во централното градско подрачје.
„Паралелно, продолжува и процесот на перење на улиците и дезинфекција со посебно средство на целокупната урбана опрема како садови за смет, мали канти, корпи за отпадоци, клупи, постојки и заштитни столпчиња на коишто исто така се пренесува вирусот. Се претпоставува дека вирусот се пренесува и преку асфалтот, затоа оваа акција интензино ќе трае во наредните денови“, вели Даниел Стојчевски, директорот на ЈП „Чистота и зеленило“ во Куманово.
Од денеска започнаa истите активности и во приградските населби и селата во Куманово.
Општинскиот кризен штаб побара од управителите на станбените објекти да извршат дезинфекција на влезовите, заедничките простории, лифтовите на сите станбени згради во Општината.
С. НИКОЛИЌ
