Смртта на велешанката Катица Маноилова за која Институтот за судска медицина објави дека кај неа бил најден коронавирус, за стручните лица од здравствениот систем на земјава е контроверзен случај. Така го нарече случајот епидемиологот д-р Владимир Микиќ од Институтот за јавно здравје. Во прв момент по објавувањето на резултатите, имаше информација дека починала на почетокот од јануари, за потоа Министерството за здравство да демантира.

„Ова е контроверзен случај, кој сѐ уште се расчистува во однос на точното време на смртта. Институтот за судска медицина го утврдува периодот кога настана смртта, дали во период од три месеци или помалку. Со тестот се детектира генетски материјал, не треба да значи дека постои жив материјал. Најдена е нуклеинска киселина која што одговара на вирусот. Сѐ уште е рано да се кажа стопостотно дали таа жена е инфицирана или не, кои се начините како вирусот дошол до неа и третото прашање, кога настанала смртта“, кажа д-р Микиќ на денешната дискусија за КОВИД-19, на која учествуваше и министерот за здравство Венко Филипче.

Маноилова беше пронајдена почината дома на почетокот од април, а соседите последен пат ја виделе на почетокот од јануари. Кај нејзиниот син со кого живееле, а чие мртво тело било до мајка си, немало регистрирано присуство на коронавирус.

• СЕ ПРАВИ УШТЕ ЕДНА АНАЛИЗА И ОБДУКЦИЈА НА ПОЧИНАТАТА ВЕЛЕШАНКА, НЕ Е ТОЧНО ДЕКА ПОЧИНАЛА ВО ЈАНУАРИ, ВЕЛИ МИНИСТЕРСТВОТО ЗА ЗДРАВСТВО
• ПОРАДИ ЕПИДЕМИЈАТА СОЦИЈАЛНИТЕ СЛУЖБИ НЕ ГИ ПРОВЕРИЛЕ МАЈКАТА И СИНОТ ОД ВЕЛЕС КОИ ПОЧИНАЛЕ УШТЕ ВО ЈАНУАРИ, А БЕА НАЈДЕНИ НЕДЕЛАВА
• КОРОНАВИРУС ИМАЛА И ВЕЛЕШАНКАТА НАЈДЕНА ПОЧИНАТА ДОМА СО СИНОТ, ТОЈ Е НЕГАТИВЕН, СПОРЕД ОБДУКЦИЈАТА ПОЧИНАЛА ВО ЈАНУАРИ
• МАЈКА И СИН НАЈДЕНИ МРТВИ ВО СТАН ВО ВЕЛЕС ОТКАКО СОСЕДИТЕ СО МЕСЕЦИ НЕ ГИ ВИДЕЛЕ

Министерот за здравство Венко Филипче објасни дека податоците од починатите ќе бидат битни за тоа што ќе следи во наредниот период.

„Ќе ја анализираме состојбата со антителата, т.н. скрининг на серолошкиот статус на населението генерално, што нема сега да почне, туку понатаму, затоа што сме сѐ уште во фаза кога откриваме активни болни, кои можат да го пренесат вирусот. Сѐ повеќе и повеќе публикации укажуваат дека има асимптоматски носители, кои со лесни или никакви симптоми се активни преносители на вирусот“, рече Филипче.

П. ПЕЧКОВ