Во трката за развивање на вакцина против КОВИД-19 Универзитетот во Оксфорд презел рано водство, пишува „Њујорк тајмс“ и тој планирал да направи повеќе од 6.000 тестирања врз луѓе до крајот на мај.

Ако се покаже ефективна, тимот од Институтот „Џенер“ планира да произведе еден милион дози од вакцината до септември, што е далеку порано од вообичаените предвидувања на здравствените професионалци дека за вакцина против КОВИД-19 ќе бидат потребни меѓу 12 и 18 месеци.

„Ние сме 80% убедени дека вакцината ќе функционира“, вели д-р Сара Гилберт, која го води проектот.

Изминатиот месец, вакцината била тестирана врз шест макаки мајмуни во лабораторија во Монтана. Тие биле изложени на висока доза на коронавирусот, но по 28 дена сите целосно оздравеле. Сепак, научниците предупредуваат дека ова не е гаранција дека вакцината ќе им понуди еднакво ниво на заштита и на луѓето.

Научниците од „Џенер“ полагаат големи надежи во својата вакцина и затоа што при некои претходни тестирања нејзините основни компоненти се покажале безбедни за луѓето.