Вицепремиерот за европски прашања Бујар Османи вели дека поголемиот број од новозаразените од изминатите 24 часа, 89 лица позитивни на КОВИД-19 доаѓаат од неколку семејства, веќе познати кластери, но сепак, рече тој, бројките и трендот на раст се загрижувачки.

„Овој пик денеска е резултат за време на полициски час“, рече Османи на прес-конференција пред Градската општа болница „8 Септември“ на презентацијата на донација на респиратори од Норвешка.

„Сакам да ги отфрлам сите теории на заговор, ова е опасна болест, болест која убива. Само ако се однесуваме како да сме заболени од коронавирус, и ако во секој контакт се однесуваме како лицето да е заболено, ќе се заштитиме. Она што го научивме досега е дека ниту една колективна мерка не е подобра од личната свест на граѓаните. Ако си сам свој полицаец и се грижиш за своето здравје и за здравјето на семејството, ќе се заштитиш. Ниту еден полицаец не може да дојде дома и да не контролира дали ги миеме рацете после допирање на предмети“, рече вицепремиерот.

Б. НЕСТОРОСКА