Зголемената побарувачка по пасошот на Вануату неочекувано го преполни буџетот на оваа пацифичка држава, што ѝ овозможи да ги финансира пакетите за заздравување од ковид-19 и од циклонот Херолд.

Во услови кога пандемијата и циклонот ги погодија речиси сите сектори на и онака кревката економија, Вануату успеа да оствари буџетски суфицит од 33,3 милиони долари во првата половина на годината, што речиси во целост се должи на контроверзната програма на продажба на пасоши. До крајот на јуни, владата по овој основ успеала да собере 62,6 милиони долари, што е речиси 80% од очекуваниот годишен приход од оваа програма. До средина на август, оваа сума пораснала на 84,6 милиони.

Државјанството на Вануату чини 130.000 долари, од кои 80.000 одат директно за владата. Официјалните податоци кажуваат дека од почетокот на годината, најмалку 650 луѓе примиле пасош на Вануату. Тој е доста баран бидејќи со него не е потребна виза за влез во Европска Унија, Велика Британија, Русија и Хонгконг. Сепак, многу малку од новите државјани навистина се населиле во Вануату.

Од почнувањето на програмата во 2016 година, Вануату насобрал големи резерви на кеш, што му овозможило да отплати добар дел од домашните и странските долгови.