Чешкиот премиер Андреј Бабиш призна дека олеснувањето на коронамерките преку летото било грешка и додаде дека епидемијата се враќа.

Тој ѝ се обрати на нацијата во моментите кога Чешка го има вториот најбрз пораст на бројот на нови случаи на коронавирус во рамките на Европска Унија. Вкупната бројка заразени вчера надмина 50.000, откако на крајот на август изнесуваше 24.618.

„Владата направи грешка кога ги олесни рестриктивните мерки преку летото, но дури и јас бев понесен од летото и општото расположение. Тоа беше грешка и не смееме да ја повториме“, кажа Бабиш.

Тој ја прифати оставката на министерот за здравство Адам Војтех, кој се повлече вчера откако беше критикуван за начинот на справување со епидемијата.

„По убавото лето, повторно се наоѓаме во тешка ситуација. За жал, епидемијата се враќа. Јасно е дека голем број луѓе нема да ги сакаат новите мерки, но мора да ги следиме. Не сакам повторно да видам целосно затворање на земјата како она во март кога беше запрена целата економија, па затоа мијте раце, носете маска и држете растојание“, изјави Бабиш.