Конгресмените ја прекинаа седницата на која Џо Бајден требаше да биде потврден за нов претседател на САД откако приврзаниците на Доналд Трамп успеаја да ги пробијат полициските барикади и да упаднат во Капитол.

Тие со голема брзина беа евакуирани од салата каде што се одржуваше седницата, додека демонстрантите можеа да се слушнат како удираат во вратата од Претставничкиот дом. Снимките однатре покажуваат полицајци со извлечени пиштоли, подготвени да пукаат ако некој успее да влезе во празната сала.

Доналд Трамп ги повика демонстрантите да останат смирени.

„Поддржете ја нашата конгресна полиција и силите на редот, тие се на страната на нашата земја. Останете смирени!“, напиша Трамп на Твитер.