„Кајмак“, седмиот филм на Милчо Манчевски, доби поддршка од Европскиот фонд за копродукција и дистрибуција на креативни кинематографски и аудиовизуелни дела – Еуримаж, на првата сесија во 2021 година. „Кајмак“, во кој Северна Македонија е носител на проектот, е копродукција со Данска и Бугарија, а во оваа сесија на Еуримаж поддржани се два филма во кои има македонско малцинско копродуцентско учество, „Живи и здрави“ на Иван Мариновиќ копродукција помеѓу Црна Гора, Србија, Хрватска, Чешка и „Долината на Шарко“ на Петра Селишкар, копродукција меѓу Франција и Словенија, соопшти Татјана Ќурчинска-Пепељугоска, македонски национален претставник во Европскиот фонд.
Поддршката за македонски филм и за два проекти во кои Македонија има копродуцентско учество е многу важно за македонската кинематографија зашто европската поддршка пристигнува и во тешкиот и неизвесен период на ковид пандемијата, вели Татјана Ќурчинска-Пепељугоска, македонски претставник во Еуримаж. (Фото: Приватна архива)
Како што објави Еуримаж, на сесијата од 16-19 март финансиски се поддржани 24 меѓународни филмски копродукции од вкупно 49 пријавени проекти, меѓу кои 3 документарци и 3 анимирани, со вкупна сума од 5,822,000 евра. „Кајмак“ е поддржан со 180.000 евра.
„Поддршката за македонски филм и за два проекти во кои Македонија има копродуцентско учество е многу важно за македонската кинематографија зашто европската поддршка пристигнува и во тешкиот и неизвесен период на ковид пандемијата. Морам уште еднаш да потенцирам дека долгометражниот „Кајмак“, во кој Северна Македонија е носител и документарниот „Долината на Шарко“, во кој е малцински учесник, добија највисоки оценки при евалуацијата, во конкуренција со значајни имиња во кинематографијата како браќата Дарден, Џесика Вудворт, Мишел Хазнавикус, Роберт Бергер, Кристина Гросан и други. Ова е особено значајно поради тоа што, и покрај извонредната конкуренција, на годишно ниво се пријавуваат по 250-260 нови филмски копродукции и навистина е тешко да се добие поддршка. Од друга страна, финансиските средства се ограничени па често се случува дел од солидните наслови да не ја добијат финансиската поддршка“, изјави Ќурчинска-Пепељугоска.
Манчевски се подготвува за снимање на неговиот нов филм „Кајмак“, поддржан од Агенцијата за филм, како и од Данскиот филмски институт и Македонската Радио Телевизија. Копродуцент на филмот е Мета Луис Фолдагер Соренсен, продуцентката на филмовите „Меланхолија“ и „Антихрист“ на Ларс фон Трир и данскиот кандидат за Оскар „Кралската афера“.
Европскиот фонд Еуримаж од своето основање во 1989 година до денес поддржал 2.160 копродукциски проекти со вкупен буџет од околу 625 милиони евра.
