Премиерот Зоран Заев денес најави дека се разгледува можноста Законот за државјанство да биде пуштен во Собрание со европско знаменце. Предлог-законот е закочен во Собранието во фаза на комисиска расправа, сега власта се бара начин како тој да помине.

„Во моментов се анализира дали може да биде повлечен и пуштен со европско знаменце доколку секако тоа е согласност со одредени директиви или регулативи на Европската унија. Немаме проблем да го пуштиме со европско знаменце оти го усогласивме заедно. Се вршат консултации дали во него има дефинирано европски директиви и регулативи кои што се имплементираат со ваквото законско решение“, рече Заев одговарајќи на новинарско прашање на доделување на пари  кои ТАВ требаше да ги вложи во карго аеродром во Штип на општините.

Измените на Законот за државјанство се предложени на барање на Алијанса за Албанците и Алтернатива. Целта, како што велат од двете партии, е да се олесни процесот за добивање државјанство на стотици граѓани кои, иако се родени или долго време живеат во Македонија, немаат државјанство.

А. АНТЕВСКА