Од денес, скопската Пожарна ќе може да интервенира при пожар и до 11 кат со новата 42-метарска скала која беше презентирана попладнево со показна вежба. Како што кажа скопскиот градоначалник Петре Шилегов, со скалата која досега ја имаше Пожарна може да се интервенира само до 5 кат.

„Бидејќи немавме ваква скала во пожарот пред неколку години, станарите од 7 кат со часови седеа затворени во нивните станови оти пожарот беше на 5 кат и не можевме одвнатре да ги евакуираме“, рече Шилегов.

Новата 42-метарска скала беше презентирана со показна вежба. (Фото: К. Попов)

Скалата за 17.5 секунди може да се пушти во цела должина и да се интервенира, кажа на презентацијата и вежбата командантот на Пожарната Владимир Симоновски.

„Оваа е најсовремена скала со дополнителна опрема која ќе овозможи брза и ефикасна интервенција“, рече Симоновски.

Скалата чини 1.7 милиони евра со ДДВ.

А. АНТЕВСКА