Северна Кореја тестираше нов проектил со долг домет способен да погоди голем дел од Јапонија, објавија државните медиуми. Според агенцијата КЦНА, проектилите летале до 1.500 километри.

Северна Кореја го изведе тестот додека не крие дека се наоѓа среде економска криза, проследена со недостиг од храна.

Американската војска објави дека последните тестирања претставуваат закана за соседните земји, додека Јапонија кажа дека ова е загрижувачки.

„Овие проектили се стратешко оружје од големо значење. Тестовите се спроведени во саботата и неделата и проектилите ги погодија своите цели, пред да паднат во територијалните води на Северна Кореја“, објави КЦНА.

Аналитичарите сметаат дека ова е првиот севернокорејски проектил со долг домет кој би можел да носи нуклеарна глава.

Северна Кореја минатата недела одржа воена парада за 73. роденден на државата, но тогаш не покажа нови балистички проектили.