Повеќе од 2.000 цивили загинале од почетокот на руската инвазија пред една недела, објавија украинските власти. Меѓу нив се и десетмина припадници на итните служби.

„Во првите седум дена од војната, руските трупи уништија стотици транспортни центри, станбени згради, болници и градинки“, велат властите.

Секојдневно се зголемува и бројот на луѓето кои ги напуштаат своите домови и бегаат во соседните земји. Над 830.000 луѓе досега избегале од Украина, кажаа од Обединетите нации вчера, додека Европската Унија предупреди дека оваа бројка би можела да порасне на четири милиони.

Полска досега примила 453.000 украински бегалци и владата вели дека секој ден пристигнуваат 50.000 нови. Многумина чекале и до 60 часа за да преминат во Полска, во редици долги 15 километри. Земјата подготви и 1.230 болници за прием на ранети.

Во Унгарија влегле над 116.000 бегалци, како и илјадници во Молдавија, Словачка, Романија и Русија.