МВР и Обвинителството ги таргетираат сите граѓани, медиуми и други субјекти кои поддржуват воени злосторства врз цивилно население, во Украина и воопшто, предупредувајќи дека според нашите закони, следува кривично гонење од една до пет години затвор.

„Одобрување или оправдување на геноцид, злосторства против човечноста или воени злосторства е кривично дело предвидено во членот 407-а од Кривичниот законик. Законот предвидува дека тој што по пат на информационен систем јавно ги негира, грубо ги минимизира, ги одобрува и оправдува ваквите дела, ќе се казни со затвор од една до пет години. Ако делото е сторено со намера за поттикнување омраза, дискриминација или насилство против некое лице или група на лица поради нивната национална, етничка или расна припадност или верска определба, сторителот ќе се казни со казна затвор од најмалку четири години”, велат МВР и Јавното обвинителство.

Во членот 404 од Кривичниот законик, пак, прецизно е наведено што опфаќа поимот воено злосторство против цивилно население.

„Јавното обвинителство и Министерството за внатрешни работи интензивно ги следат сите изјави и коментари на социјалните медиуми поврзани со случувањата во Украина и согласно своите законски надлежности ќе преземат кривичен прогон против сите сторители кои со своите објави и јавно изнесени ставови ќе го сторат наведеното кривично дело. Апелираме и до граѓаните кои ќе забележат вакви случаи да ги пријавуваат на меилот [email protected] за соодветно постапување”, се вели во заедничкото соопштение.