Украинската војска соопшти дека почнала втората фаза од војната во Украина откако руските сили вчера направиле обид да ги пробијат одбранбените линии долж целиот фронт во регионите Доњецк, Луганск и Харкив, чија должина изнесува речиси 500 километри. Русија ја најави оваа офанзива кога се повлече од киевскиот регион и северот на Украина, истакнувајќи дека ќе ги фокусира своите напори на целосното ослободување на Донбас.
Кога Владимир Путин зборува за Донбас, тој мисли на старата украинска област за производство на јаглен и челик, по што се подразбираат големите источни региони Доњецк и Луганск, кои се протегаат од Мариупол на југот до северната граница.
„Кремљ го идентификуваше Донбас како дел од Украина во кој се зборува руски, но е повеќе Русија отколку Украина“, вели Сем Крени-Еванс од Кралскиот институт за обединети услуги.
Минатиот месец, Москва тврдеше дека контролира 93% од Луганск и 54% од Доњецк. Пред почетокот на војната, која Путин ја оправда со тоа дека Украина спроведува геноцид на истокот, речиси две третини од источните региони беа под контрола на Киев. Ако Русија успее да ги освои двата големи региона, следниот чекор би била анексија на Донбас, налик на Крим во 2014.
Руските сили се обидуваат да ги опколат Украинците, движејќи се од северот, истокот и југот. По седум недели борби, тие не успеаја да го освојат Харкив, но го контролираат стратешки важниот град Изјум. Следните големи цели на Русите се Словјанск, град со 125.000 жители и Краматорск.
„Ако Украина успее да го задржи Словјанск, руската кампања да ги заземе двата региона веројатно ќе пропадне. Русите тврдат дека го зазеле Рубижне и уништиле големи делови од Лисичанск и Попасна. Овие градови им се важни заради поврзувањето на трупите и натамошното напредување“, проценува американскиот Институт за проучување војна.
Гувернерот на Луганск, Серхиј Гајдај, верува дека руските сили ќе уништуваат сè на својот пат за да ја остварат амбицијата на Путин да стигне до западните граници на Луганск.
„Не ја знаеме моменталната сила на украинската војска, но се верува дека најдобро обучените и екипирани бригади се распоредени на истокот. Нивната главна цел е да им нанесуваат што е можно поголеми загуби на Русите, користејќи асиметрична тактика, за да избегнуваат големи битки“, вели Крени-Еванс.
