Третата парада на гордоста вечерва делифира низ улиците во Скопје. Неколку илјади граѓани маршираат под мотото „Излези за љубов! Достоинство. Еднаквост. Правда.“, а маршот ќе заврши со културно-забавна програма на стадионот на АРМ во Градскиот парк.

Огромно знаме со боите на виножитото е традиционалниот реквизит на парадата, на која има и транспаренти со пораки за еднаквист и толеранција, меѓу кои и „Само кревко его се плаши од еднаквост“ и „Гордост, а не предрасуди“.

Фото: (К. Попов)

Ќе пеат Андреа и Наде Спасовска-Талевска, ќе настапат диџеи и дрег кралици од земјата и од регионот, а програмата ќе ја води актерката актерката Наталија Теодосиева.

Парадата, која ја организира Националната мрежа против хомофобија и трансфобија, со лично присуство ја поддржаа повеќемина јавни личности, активисти и политичари, меѓу кои и вицепремиерот Бојан Маричиќ и министерката за труд Јована Тренчевска и американската амбасадорка Кејт Мари Брнз.

Претседателот Стево Пендаровски денеска посети волонтери и организатори на Парадата, и како што соопштија од Кабинетот, со нов разговараше за логистика и дадената институционална поддршка, безбедносните и промотивните прашања.

Вицепремиерот Бојан Маричиќ и американската амбасадорка Кејт Мари Брнз. (Фото: К. Попов)

„Прифаќањето на различностите и ослободеност од предрасуди се показател на зрело, демократско и отворено општество кое е подготвено да направи простор за секој од неговите членови. Имаме заедничка одговорност да овозможиме уживање на основните права и себереализација на секој, без страв од отфрленост, особено кога станува збор за ранливите заедници. Скопје прајд 2022 е парада на различност, прифаќање и дружба на ЛГБТИК+ заедницата, но и можност за сите кои ја разбираат и прифаќаат различноста по основ на сексуална ориентација и родов идентитет да ја искажат својата поддршка“, рече Пендаровски.

(Фото: К. Попов)

Премиерот Димитар Ковачевски ја поддржа Парадата како „од значајните демократски случувања во Северна Македонија“.

„Како Влада посветено работиме за да овозможиме добробит на сите граѓани – донесовме Закон за спречување и заштита од дискриминација каде влегоа и сексуалната ориентација и родовиот идентитет. Комисијата за заштита од дискриминација за прв пат има лица и од граѓанскиот сектор. Има уште предизвици, но заедно и посветено ќе ги решаваме и надминуваме“, објави на Фејсбук Ковачевски.