Со механизација и работници се чистат дивите депонии во националниот парк Шар Планина. Активностите опфаќаат чистење на 16 диви депонии во Општина Тетово и 12 диви депонии во општините Боговиње, Врапчиште и Гостивар и транспорт на отпадот до депонијата „Русино“.

Парите за чистење на депониите се обезбедени од Министерството за животна средина и просторно планирање. Министерот Насер Нуредини кажа дека општините согласно Законот за управување со отпад имаат обврска за собирање и транспорт на комуналниот отпад и целосно покривање на подрачјето на кое ја извршуваат јавната услуга за управување со отпад, вклучително и изолираните населби.

„Единствено на овој начин може да се спречи повторното појавување на диви депонии во овие општини“, кажа Нуредини.

Шар Планина беше прогласена за национален парк пред една година.