Секако не се очекува пациенти да купуваат терапија за себе, државата, т. е Клиниката треба да се грижи за навремено снабдување, но јас сум оптимист и очекувам да бидат надминати овие пречки, рече денеска министерот за здравство Беким Сали, по реакциите на oперирани од рак, како и пациенти со ретки болести дека со месеци се оставени без потребните терапии за нивните лекувања, а тоа се лекови што продолжуваат и спасуваат живот.
Одговарајќи на новинарско прашање до каде е набавката на лекови за пациентите од Онкологија, на денешниот настан за Светски ден на предвремено родени бебиња, министерот рече дека Клиниката треба да се грижи за пружање на здравствена услуга, особено имајќи во предвид дека се работи за онколошки пациенти кои се осетливи на терпијата која треба да биде дадена во континуитет.
„Тоа е една од причините зошто побарав оставка од претходниот директор. Со новата директорка сме во комуникација за надоместување на таа празнина и временски не можам да прецизирам бидејќи не сум вклучен во набавката на лековите, но сум оптимист и очекувам да бидат надминати овие пречки. Ретките болести се третираат со централна набавка, опремата е централизирана, а секако и инсулинот се купува централизирано, знаејќи дека мора да биде покриена цела држава и да нема пропуст. Сè уште нема одлука за централизирање на набавките“, рече Сали.
Дигиталната редакција САКАМДАКАЖАМ.МК на 11 ноември објави дека 27 здруженија за заштита на правата на пациентите се собрале и заеднички испратиле писма до премиерот, Генералниот секретар на Владата, до Министерството за здравство и до Фондот за здравствени осигурување. Но, досега не добиле никаков одговор.
Здруженијата за правата на пациентите уште во јануари биле свесни дека ќе се случи ваква ситуација, особено за тие лекови што не се на позитивната листа и се набавуваа со програма со посебен буџет на Фондот за здравствено осигурување на Македонија (ФЗОМ). Испраќале писма и до претходното раководство на Фондот и на Клиниката за онкологија, како и до Министерството за здравство, кои ги убедувале дека сѐ е во ред, потребни се набавки и сѐ ќе се реши.
„Луѓето имаат проблем со континуирана набавка. Треба да се смени позитивната листа. Ни викаат: ‘Тие лекови што не се на позитивна листа па не мора ни да ги обезбедиме’. Иако е нехумано – да имаш добар лек, да се навикнеш на него и сега да го немаш. На многу пациентки овие лекови им значат целосно излекување“, велат од здруженијата.
Повеќе од два месеца го нема лекот „херцептин“ кој го примаат пациентки што се оперирани од рак на дојка и ја поминале хемотерапијата. Станува збор за лек кој во земјава се користи веќе три години, од најнова генерација имунотерапија кој дава одлични резултати во третманот на ова малигно заболување. Лекот беше достапен на Клиниката за онкологија во времето на министерот Венко Филипче, но според кажувањата на пациентките, тој периодов не е достапен преку Клиниката, а да го купат приватно чини над 2.000 евра месечна доза.
Во објаснувањата за овој лек се наведува дека „ова откритие е едно од главните достигнувања во антиканцер терапијата и целното уништување на туморските клетки“.
„Овој лек, го нема веќе неколку месеци. ‘Херцептинот’ не се дава секому. За да се прими, потребни се повеќе испитувања кои се вршат на институтите на Медицинскиот факултат. Но, и тие што треба да го примат, не можат. Прашавме кога ќе го добијат, ни рекоа: ‘Ќе го добиете кога ќе стигне’“, вели нашата соговорничка, пациентка која се опоравува по хемотерапија и операција на рак на дојка.
Б. НЕСТОРОСКА
