Дваесет и пет луѓе се обвинети за вмешаност во шемата за продажба на лажни дипломи за медицински сестри на неколку училишта во Флорида. Федералните обвинители кажаа дека на овој начин биле поделени повеќе од 7.600 лажни дипломи.

Трите медицински школи во кои што биле продавани лажните дипломи во меѓувреме се затворени, а секој од обвинетите се соочува со затворска казна до 20 години.

„На овој начин не само што се загрозува јавната безбедност, туку и се фрла дамка врз репутацијата на медицинските сестри. Шемата со лажните дипломи ја нарушува довербата на јавноста во нашиот здравствен систем“, изјави Маркензи Лапоинт, обвинител за Јужниот округ на Флорида.

Околу 7.600 студенти платиле вкупно 114 милиони долари за лажните дипломи, кои им овозможувале да го полагаат националниот испит за медицински сестри и потоа да добијат лиценца за работа во повеќе американски сојузни држави.