Доналд Трамп се пријави ноќеска во окружниот затвор во Фултон по серијата обвиненија во врска со неговите напори да го промени изборните резултати во државата Џорџија во 2020 година, што е четврти пат годинава како американскиот претседател се соочува со обвиненија.

Трамп помина нешто повеќе од 20 минути во окружниот затвор, каде што беше обработен и ослободен со кауција. Според податоците од судот, тој е висок 190 сантиметри и тежок 97,5 килограми, со сини очи и руса коса.

Беше и објавена официјална фотографија од него во окружниот затвор, по неговото заминување.

Трамп го нарече искуството во окружниот затвор „ужасно“ и „многу тажно“ подоцна во интервју за „Њузмакс“, додавајќи: „цел мој живот не сум знаел ништо за обвиненија и сега сум обвинет четири пати“

Во април, Трамп беше обвинет во Њујорк во врска со пари за замолчување. Во јуни беше обвинет во Мајами во врска класифицирани документи и претходно месецов беше обвинет во Вашингтон исто така за обидите да ги промени изборните резултати во 2020 година.
Сите овие случаи може да почнат со судење следната година, кога се и претседателските избори.

Како и останатите 18 обвинети во случајот во Џорџија, Трамп брзо беше обработен во окружниот затвор, бидејќи неговите адвокати веќе ја договорија сумата што се остава како гаранција. Трамп се согласи да плати 200.000 долари за да биде ослободен, но, исто така, се согласи и да не ги користи социјалните мрежи за да ги напаѓа другите обвинети и сведоците во случајот.