Во Куманово улиците и тротоарите се вистински лизгалиште, бидејќи снегот не е исчитен и целосно е заледен. Стотина кумановци побарала помош на хируршкото одделение во Општата болница Куманово, поради повреда добиена од паѓање на замрзнатите улици и тотоари во последните 4 дена. Најлошо поминале триесетина од нив, кои добиле со скршеници по телото, па завршиле во гипс или во болница.
„Пет пациенти добија сериозни скршеници по телото, скршен колк, прсти или ребра и се пренесени на клиниките во Скопје или задржани се на лекување во нашата болница. На 29 луѓе ставен им е гипс и пуштени се на домашно лекување, а 58 пациенти побараа помош поради повреди од пад, пред сѐ шинување, истегнување на мускул, нагмечување на одреден дел на тело и слично. Се работи за лица од сите генерации повозрасни, млади и деца“, велат за САКАМДАКАЖАМ.МК од хируршкото одделение во Општата болница Куманово.
Скршени колкови и ребра добиле луѓе од 60-70 годишна возраст, а децата и помладите главно со скршеници на прстите и дланките, бидејќи при пад се задржуваат на рацете. Најмногу пациенти со скршеници имало во петокот кога падна првиот снег, па за времето на празниците бројот се намалил, а од утринава повторно е во пораст.