Иако на последниот ден од претседателските избори во Русија има само еден можен исход, илјадници Руси се решија да протестираат против автократското владеење на Владимир Путин со чекање во долги редици пред гласачките места точно напладне. Тоа е одговор на повикот на починатиот опозиционер Алексеј Навални, кој апелираше на ваков потег пред ненадејно да почине во арктички затвор.

Протест „Пладне против Путин“ со формирање долги редици пред гласачките места се случи во Москва, Санкт Петерзбург, Јекатеринбург, Челјабинск, Томск и Новосибирск, и беше впечатлив, иако залуден, потег за спротивставување на пораката на Кремљ дека Путин е легитимен претседател со огромна поддршка.

Многу гласачки места во Москва беа празни утрово, но долги редици за гласање се појавија точно напладне, и покрај пораките на властите до граѓаните да не учествуваат во „екстремистички“ акции.

Навални, кој долги години се бореше за слободни и фер избори во Русија, и му беше забрането да се кандидира за претседател во 2018 година, ги повика граѓаните да гласаат против Путин во недела напладне.

Неговата вдовица Јулија Навална го обвини Путин дека го наредил убиството на нејзиниот сопруг, и многу западни лидери рекоа дека Путин е одговорен за неговата смрт.

Кремљ ги негира обвинувањата.

Со победа на претседателските избори, Путин ќе добие нов шестгодишен мандат, а со устаВни измени си обезбеди можност да остане на власт до 2036 година.