Зградата на Владата е обрасната со трева висока над еден метар. Целиот двор на Владата личи на џунгла и на никого не му пречи тоа, екипите на ЈП „Паркови и зеленило“ нигде ги нема да ја искосат тревата, како и во цело Скопје.
Екипите на ЈП „Паркови и зеленило“ нигде ги нема да ја искосат тревата. (Фото: К. Попов)
Објектот личи како да е запуштен и како никој да не го користи. Во зградата на Владата на 3 мај министрите и техничкиот премиер Талат Џафери одржаа седница, но никој не реагирал зошто тревата не е искосена.
Објектот личи како да е запуштен и како никој да не го користи. (Фото: К. Попов)
Генералниот секретар на Владата Методија Димовски ни рече дека надлежно за тревата во Владата е ЈП „Паркови и зеленило“ и се согласува дека не доликува објектот да е обраснат. Кажа и дека уште денеска институционално ќе побараат да се искоси тревата.
Оваа пролет цело Скопје е зараснато во треви и плевел. Кејот на реката Вардар, но и зеленилото долж булеварите и парковите се неискосени.
Обврската за косење на тревата низ градот е на ЈП „Паркови и зеленило“. Зошто не се коси и дали воопшто ќе се коси не може да се дознае, затоа што на директорите на претпријатијата што ги поставува градоначалничката Данела Арсовска им е забрането да комуницираат со медиуми.
Во Скопје уште не е почната ниту постапката за прскање против комарци. Првото прскање се врши кон средината на април. Но, годинава тоа не е направено оти пропадна дел тендерот на Град Скопје.
А. АНТЕВСКА
