Локален политичар од крајнодесничарската партија Алтернатива за Германија (АфД) е повреден во напад со нож во Манхајм, објави новинската агенција ДПА. Инцидентот се случи само неколку дена по нападот со нож во истиот град, кога на антиисламистички собир беше убиен полицаец.

Локалниот огранок на АфД објави дека повредениот политичар е во болница и дека напаѓачот можеби бил радикален левичарски активист. Тој бил нападнат кога се обидел да спречи некого да ги искине неговите плакати за претстојните локални избори во сојузната покраина Баден-Виртемберг. Напаѓачот бил уапсен.

„Шокирани сме и вознемирени“, изјави локалниот шеф на АфД, Маркус Фронмаер.

Полицијата на Манхајм го потврди инцидентот и кажа дека денеска ќе објави повеќе детали.

Ова е последниот во серијата напади врз германски политичари во последно време. И владејачки и опозициски партии се пожалија дека нивните членови и симпатизери се соочија со бројни физички и вербални напади во изминатите месеци.