ГЕРБ на бившиот премиер Бојко Борисов е победникот на шестите парламентарни избори во Бугарија за период од три години, но ќе му требаат најмалку два коалициони партнера за да формира влада. По речиси 95% избројани гласови, ГЕРБ има освоено нешто помалку од 25%, со што и овие избори веројатно нема да стават крај на политичката нестабилност во земјата.

Движењето за права и слободи (ДПС), кое го претставува големото турско малцинство, е на второто место со речиси 16% гласови, па следува прозападниот блок Продолжуваме со промената (ПП) со нешто помалку од 15%.

Според нецелосните резултати, седум партии и коалиции ќе имаат пратеници во новиот состав на парламентот, кои го надминаа прагот од 4% освоени гласови.

Изборите уследија по распадот на коалицијата ГЕРБ-ПП во март, која траеше девет месеци. Борисов ја водеше земјата повеќе од една деценија, пред да ја изгуби власта во 2021 по масовните протести против корупција, по што ниедни избори не донесоа стабилност.