Лидерите на Европската Унија денеска ќе се сретнат за првпат од одржувањето на изборите за Европскиот парламент за да дискутираат за политичките цели за следните пет години и кој ќе ги добие највисоките функции во Брисел. На овие избори најдобро поминаа десниот центар и десничарските националисти, додека тие беа понижувачки за Емануел Макрон и Олаф Шолц.

Лидерите ќе разговараат кои ќе бидат идните претседатели на Европската комисија и Европскиот совет и кој ќе ја води надворешната политика, но се чини тоа е веќе решено.

Урсула фон дер Лајен е фаворитка да го обезбеди вториот мандат на чело на Европската комисија благодарение на добрите резултати на Европската народна партија (ЕПП) на изборите. Тринаесет од 27-те лидери на ЕУ доаѓаат од партии кои се дел од ЕПП, а таа има поддршка и од Германија и Франција, со што има доволно мнозинство да остане на функцијата.

Бившиот португалски премиер Антонио Кошта треба да биде новиот претседател на Европскиот совет, додека либералната естонска премиерка Каја Калас е главен кандидат за функцијата еврокомесар за надворешни прашања.

Лидерите ќе ги потврдат своите избори на самитот на ЕУ на 27/28 јуни. Фон дер Лајен ќе треба да добие поддршка и во Европскиот парламент, чија прва сесија е закажана за 16 јули.