Александар Лукашенко го помилувал германскиот државјанин Рико Кригер, кој во Белорусија беше осуден на смрт. Кригер бил уапсен во октомври и осуден за делување како платеник и за поставување експлозиви, но веста за неговата пресуда стана позната дури минатата недела.

Одлуката на Лукашенко значи дека смртната казна се заменува со доживотен затвор. Чудниот тек на случајот поттикна шпекулации дека Белорусија сака да го искористи Кригер во размена на затвореници, која би ги вклучила и Русија и Германија.

Пред неколку дена, Белорусија објави видео во кое Кригер признава дека сакал да прави саботажи и го моли германскиот канцелар Шолц за помош. Министерствата за надворешни работи на Германија и Белорусија потврдија дека разговараат, при што се разгледувале неколку предлози.

Кригер е првиот западњак осуден на смрт во Белорусија. Тој е обвинет дека сакал да минира пруга во Белорусија по инструкции од Украина, за што Белорусија не приложи докази во објавеното видео.

Кригер би можел да има клучна улога во сложена размена на затвореници, во која Русија сака да го добие платениот убиец Вадим Красиков, кој е во затвор во Германија.