По поднесена од кривична пријава од Министерството за внатрешни работи против едно лице, Основното јавно обвинителство Скопје донесе наредба за спроведување истрага против осомничениот за едно Убиство по член 123 став 2 во врска со став 1 точка 4, за Убиство во обид по член 123 во врска со член 19 и за кривично дело, за убиството што се случи вчера претпладне на паркингот до ТЦ „Мавровка“ во Скопје. Осомничениот ќе одговара и за Неовластено изработување, држење, посредување и тргување со оружје и експлозивни материи од член 396 став 3 во врска со став 1 од Кривичниот законик.

„На 20 август, со пиштол марка ‘глок’ со калибар 9 милиметри, што го поседувал без дозвола, осомничениот на паркинг-просторот на улицата ‘Филип Втори Македонски’ во Скопје, позади трговскиот центар ‘Мавровка’, со умисла и од користољубие лишил од живот едно лице, по што од сопругата на жртвата одзел торба со лаптоп и избегал со автомобил ‘ауди’ без регистарски ознаки. На местото пристигнало и второ возило ‘цитроен’ со белгиски регистарски ознаки, од кое излегло засега непознато лице, од багажникот на автомобилот на жртвата одзело гајба со рачен алат и исто така избегало“, соопшти денеска Скопското обвинителство.

„Цитроенот“ вториот осомничен го оставил во Гази Баба и се качил во „аудито“, по што продолжиле да се движат, но на тамошната улица „Стојна Стефкова“ биле пресретнати од полициски службеници. Додека другото лице управувало, сега осомничениот излегол од совозачка врата и пукал, обидувајќи се да ги лиши од живот полицајците кои сакале да го запрат. Четворицата полициски службеници во самоодбрана испукале неколку предупредувачки проектили во воздух со службеното оружје, па го совладале и привеле осомничениот. Не го раниле.

Додека траела пукотницата, другото лице избегало и по него се трага.

Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомниченото лице, која е одобрена. Притворот е 30 дена.

• НЕ Е ВООБИЧАЕНО МВР ДА НЕ КАЖЕ НИТУ ИНИЦИЈАЛИ НА УАПСЕНИТЕ, ВЕЛИ СЛАВЈАНКА ПЕТРОВСКА ЗА УБИСТВОТО КАЈ „МАВРОВКА“
• УБИЕН Е ВНУК НА ЗЛАТАР ПРЕД ТРГОВСКИОТ ЦЕНТАР „МАВРОВКА“ ВО СКОПЈЕ, УБИЈЦИТЕ МИСЛЕЛЕ ДЕКА НОСИ ЗЛАТО ВО КОЛАТА

С. К. ДЕЛЕВСКА