Мајката на фолк-пејачот Наум Петрески, Анастасија, на 81 година сними дует со својата снаа Зуица Лазова, пејачка и професорка по хармоника во ДМБУЦ „Илија Николовски-Луј“. Лазова сношти промовираше пет песни и го прослави својот 50. роденден. Дел од проектот „5 за 50“ е и песната со Анастасија Петреска, „Ќе ти купам свилен фустан бре Зуице“.

Мајката на Наум Петрески се расплака додека ја пееше песната со снаата, пред семејството и пријателите на промоцијата.

„Би сакала сите да сте живи и здрави и да ги доживеете моите години. Не само 81, туку и повеќе“, рече Петреска.

Таа пее народни песни цел живот, но многу ретко јавно, а присутните кои досега не ја слушнале коментираа дека има убав глас.

Зуица Лазов со синот Стефан и со сопругот Наум Петрески ја сними песната „Даме од Македонија“ (Фото: СДК.МК)

„Мојата мајка почина рано, но оваа жена ми е како мајка и се грижи за сите нас. Мама Анастасија, покрај тоа што го чува своето чедо Наум, ме чува и мене. Затоа решив да снимам песни со целото семејство, а секако и со мојата мајче. Ова ѝ беше ветено од лани, за нејзиниот роденден“, рече Зуица Лазова.

Со ќерката Македонка Петреска, која наскоро ќе дипломира соло пеење на Факултетот за музичка уметност во класата на Весна Ѓиновска-Илкова, Лазова испеа преработка на песната „Симпатија“ од хрватската група „Магазин“. Пред 30 години оваа песна беше регионален хит откако Данијела Мартиновиќ и „Магазин“ ја снимија со хрватска оперска пејачка Марија Бубиќ, а сега Зуица Лазова ја преработи со својата ќерка, идна оперска пејачка. Со сопругот Наум Петрески, кој ѝ подари цвеќе за роденденот, и со синот Стефан, Лазова ја испеа „Даме од Македонија“. Синот на познатите фолк-пејачи е исто така музичар, тој е втора година во средното музичко училиште.

Со ќерката Македонка Петреска која наскоро ќе дипломира соло пеење на Факултетот за музичка уметност, Зуица Лазова испеа преработка на песната „Симпатија“ од хрватската група „Магазин“ (Фото: СДК.МК)

„Во последнава од петте песни ѝ се враќам на мојата прва љубов, хармониката“, кажа Лазова за песната „Мојата хармоника“, на која свири и пее.

Сите песни се оригинални и во духот на македонската народна музика. Првата песна која таа самата ја пее се вика „Реканска“. Автори се Илија Јаневски, нејзиниот колега од музичкото училиште, Соња Дојчиновска, која ја водеше промоцијата и Љупчо Соколовски.

М. ЏАРОВСКА