Гужва во спортската сала „Боро Чурлевски“ во Битола. Стотици граѓани утрово дојдоа да ги подигнат ваучерите за купување и вградување на високоефикасни инвертер клима-уреди што го доделува Министерството за енергетика.
Битолчани се жалат на лоша организација и гужва пред пунктовите каде се доделуваат ваучерите. Граѓаните се прозиваат по азбучен ред, но внатре нема уред за озвучување, а толпата и вревата се големи што не се слушаат имињата. Пред Спортската сала имаше дури и полициско возило.
На интернет страницата на Министерството за енергетика е објавено дека доделувањето на ваучерите за општините Битола, Новаци и Могила ќе се изврши денес во Спортската сала во Битола од 9 до 17 часот без да бидат објавени листи по азбучен ред на избраните физички и правни лица и во кое време да дојдат, па така сите избрани субјекти нагрнаа во исто време уште од 9 часот утрово.
Ж. ЗДРАВКОВСКА
