Премиерот Христијан Мицкоски не очекува да има поскапување на струјата од 1 јануари, но и ако дојде до тоа, вели дека зголемувањето би било 1-3%, а не, како што рече, 10-20% како во многу држави од регионот и Европа.

„Не очекувам да има зголемување од 10, 15 или 20 проценти како што е тоа случај во многу држави од регионот и Европа. Очекувам, ако има зголемување, тоа да биде незначително во рамки од еден до три проценти“, рече Мицкоски, одговарајќи на новинарски прашања на прес-конференцијата во Владата по потпишувањето на договорите за државна помош со компанијата „Бреинчајлд“.

Минатата недела, претседателот на Регулаторната комисија за енергетика Марко Бислимоски кажа дека се анализираат барањата за нови цени доставени од МЕПСО, МЕМО и Електродистрибуција, а во декември барање за нова цена ќе достави и универзалниот снабдувач ЕВН Хоум.

Тој рече дека не очекува проблематични одлуки кои би влијаеле на буџетот на домаќинствата.