Американскиот милијардер Илон Маск ја поддржа крајната десница на претстојните вонредни парламентарни избори во Германија, опишувајќи ја како спасител на земјата.

Алтернатива за Германија (АфД) се наоѓа на второто место во предизборните анкети и би можела да го спречи мнозинството на десниот или левиот центар, но партиите кои гравитираат кон центарот ветија дека ќе ја избегнат поддршката од крајната десница на национално ниво. Германија ќе оди на вонредни избори на 23 февруари откако му беше изгласана недоверба на канцеларот Олаф Шолц.

„Само АфД може да ја спаси Германија“, напиша Маск на Икс, на што му одговори лидерката на партијата Алис Видел.

„Да, апсолутно си во право! Социјалистката Меркел ја уништи нашата земја, а Советската Европска Унија ги уништува државите и ја прави Германија неисправна“, кажа Видел, која ќе биде кандидатка на АфД за канцелар.

Маск, најбогатиот човек на светот, веќе им даде поддршка на други антиимиграциски партии низ Европа.