Гувернерот на Калифорнија Гавин Њусом повика на независна истрага за тоа како критичните противпожарни хидранти останале без вода и ја „оштетиле“ борбата против шумските пожари во областа Лос Анџелес.

„Губењето залихи од противпожарните хидранти веројатно ги наруши напорите да се заштитат некои домови и коридори за евакуација“, рече Њусом.

Тој вели дека е потребна истрага за губење на притисокот на водата на локалните противпожарни хидранти и пријавена недостапност на залихи на вода од акумулацијата Санта Инез. Гувернерот вели дека е неопходен „сеопфатен преглед“ „за да се осигураме дека ова нема да се повтори и дека ги имаме сите достапни ресурси за борба против овие катастрофални пожари“.

Најмалку 11 лица загинаа во пожарите досега, а се проценува дека се уништени повеќе од 10.000 домови и други објекти. Наредбата за евакуација се прошири во близина на пожарот Палисејдс додека властите работат на локализирање на пожарот, кој гори од вторникот. Горат најмалку шест пожари. Најновиот пожар, наречен пожар Арчер, започна вчера и не е под контрола.

Претседателот Џо Бајден кажа дека Лос Анџелес е како „воена сцена“, и предупреди дека бројот на загинати веројатно ќе се зголеми. Прогнозата за посилни ветрови ги зголемува стравувањата дека пожарите би можеле дополнително да се шират и има предупредување со црвено знаме – што укажува на критични услови за пожар.

Властите во Лос Анџелес прогласија локална здравствена вонредна состојба во целата област поради лошиот квалитет на воздухот, бидејќи огнената пепел и чадот од шумските пожари ја покриваат областа. Во соопштението, Јавното здравство на округот Лос Анџелес издаде декларација и наредба за јавно здравје, бидејќи пожарите и силните ветрови „сериозно го деградираа квалитетот на воздухот… што носи непосредни и долгорочни ризици за јавното здравје“. Властите додаваат дека пожарите ги принудиле жителите да ги напуштат своите домови како и да се евакуираат здравствените установи, со што се нарушени „виталните здравствени услуги и ресурси“. Се препорачува да не се излегува надвор, да се носи маска ако се оди на отворено во услови на чад. Домашните миленици исто така треба да се чуваат во затворени простории.